冬，朱古力的季節。
冬，朱古力的季節。 啱啱過完聖誕節，大家有冇整薑餅人呀？ 當你諗住過左聖誕節可以唞一唞嘅時候，你唔好唔記得又到情人節同農曆新年啦！你哋好快啲準備定整朱古力同蒸糕啦！有排你哋忙啊！Haha... 今日等我教大家整下朱古力啦！我記得我細個嘅時候成日比卡通片誤導，通常卡通片啲主角整朱古力嘅時候，佢哋就會將啲朱古力直接擺個煲上面煮，然後放雪櫃雪返硬就搞掂。其實朱古力調温比你想像嘅複雜1,000,000倍！聽到我講到好似好複雜咁樣，有冇比我嚇窒左你先？放心放心，我今次就會教大家整一個又簡單、又好味、又高貴嘅朱古力啦！講到高貴嘅朱古力，又點少得松露朱古力啊！嗰種濃郁細滑、入口即溶、先苦後甜、然後可可嘅果味充滿你嘅口腔，真係好容易食上癮㗎！然後你再睇落去你就會發現原來係好容易整架！ 松露朱古力 Chocolate truffle，原來佢裏邊係冇"松露"架，咁點解佢又會叫做松露朱古力呢？原來古時嘅人覺得呢種朱古力同松露一樣珍貴，所以先明名為松露朱古力！ 事不宜遲啦我哋開始整Truffle啦喂! 首先選擇朱古力方面我會推介大家用70%嘅黑朱古力，我推介兩個品牌比大家：Valrhona(法國), Callebaut(比利時），二兩款都係quality比較好嘅朱古力，對自己好啲食好啲！ 1.首先我哋預備一個煲將200g淡忌廉煮至微滾。 2. 再將煮熱左嘅淡忌廉裝入200g朱古力中，攪勻至朱古力完全溶解及滑身。 3. 加入20g 凍牛油攪勻，可以加入少量烈酒調味，如 Rum, Brandy, Whisky... 4. 放入雪櫃雪半個鐘。 5. 拿小份量於手心滾圓，再用可可粉覆蓋整個朱古力，放雪櫃冷藏儲存。 祝大家情人節快樂！